មន្ត្រីអធិការកិច្ចជលផល នៃអគ្គនាយកដ្ឋានជលផល សហការជាមួយកម្លាំងចម្រុះ និងមានការសម្របសម្រួលពីស្ថាប័នអយ្យការ បានបើកប្រតិបត្តិការទ្រង់ទ្រាយធំុចុះបង្ក្រាបការនាំចូលត្រីប្រាខុសច្បាប់

ថ្ងៃទី២៧ខែកក្កដាឆ្នាំ២០២៦
(ខេត្ត​ព្រះវិហារ)៖ មន្ត្រីអធិការកិច្ចជលផល នៃអគ្គនាយកដ្ឋានជលផល សហការជាមួយកម្លាំងចម្រុះ និងមានការសម្របសម្រួលពីស្ថាប័នអយ្យការ បានបើកប្រតិបត្តិការទ្រង់ទ្រាយធំុចុះបង្ក្រាបការនាំចូលត្រីប្រាខុសច្បាប់ ដោយរឹបអូសបានត្រីប្រាចំនួន ១៨តោន ព្រមទាំងរថយន្តដឹកជញ្ជូន ១គ្រឿង នៅស្រុករវៀង ខេត្តព្រះវិហារ។
​ប្រតិបត្តិការក្តៅនេះ បានធ្វើឡើងនៅថ្ងៃទី ២៧ ខែកក្កដា ឆ្នាំ២០២៦ ក្រោមការដឹកនាំផ្ទាល់ពីលោក ភួង ទីណា ប្រធាននាយកដ្ឋានអធិការកិច្ចជលផល នៃក្រសួងកសិកម្ម រុក្ខាប្រមាញ់ និងនេសាទ ដោយមានការសម្របសម្រួលនីតិវិធីពីលោកព្រះរាជអាជ្ញា អមសាលាដំបូងខេត្តព្រះវិហារ។
​ទីតាំងចុះបង្ក្រាប៖ ភូមិរំចេក ឃុំរមណី ស្រុករវៀង ខេត្តព្រះវិហារ។​វត្ថុតាងចាប់យក៖ រថយន្តស៊េរីធំម៉ាក HYUNDAI ពាក់ស្លាកលេខ រតនគិរី 3A-9055 ដឹកត្រីប្រាចំនួន ១៨តោន។
​ស្ថានភាពជនសង្ស័យ៖ ជនសង្ស័យចំនួន ២នាក់ ដែលជាអ្នកបើកបរនិងអ្នកដឹកជញ្ជូន បានឆ្លៀតឱកាសរត់គេចខ្លួនចូលព្រៃបាត់ស្រមោល ខណៈសមត្ថកិច្ចចុះអន្តរាគមន៍។
មហាជនកំពុងដាក់ការសង្ស័យ និងទាមទារឱ្យសមត្ថកិច្ចជំនាញធ្វើការស៊ើបអង្កេតឱ្យបានស៊ីជម្រៅបន្ថែមទៀត ដើម្បីឆ្លើយតបនឹងសំណួរថា «តើត្រីប្រាទាំង ១៨តោននេះ នាំចូលមកពីច្រកណាមួយ ឬមកពីគោលដៅណាប្រាកដ?» និងដើម្បីវែកមុខមេខ្លោងធំៗនៅពីក្រោយខ្នងដែលហ៊ាននាំចូលផលិតផលជលផលខុសច្បាប់បំផ្លាញទីផ្សារកសិករក្នុងស្រុក។
​បច្ចុប្បន្ន លោកព្រះរាជអាជ្ញា បានបញ្ជាឱ្យមន្ត្រីជំនាញកសាងសំណុំរឿងតាមនីតិវិធីច្បាប់ និងកំពុងពន្លឿនការស្រាវជ្រាវស្វែងរកម្ចាស់ទំនិញ និងជនសង្ស័យទាំង ២នាក់ ដើម្បីយកមកផ្តន្ទាទោសតាមច្បាប់ជាធរមាន! ៕ដោយ
និពន្ធនាយក ប៊ុនស៊ី